Was mir so ufgfalle isch im Ländle

Wie dr Willy Seiler no g'läbt had, hadder jeden Samschdag im Süddeutsche Rundfunk a Glosse g'hed: "Was mir so ufg'falle isch im Ländle" had se g'heiße. Und er hat immer um kurz nach elfe im Samschdagsmagazin so uffspiesd, was in der abglaufne Woch so alles passier g'wä isch. Seid 1988 isch der Willy Seiler dod und de Süddeutsche Rundfunk gibt's au nemme. Mer hadd'en Südwestrundfunk draus g'macht, aber des isch nix rechts g'worre.

So isch die Rolle vom Hofnarr also seidher frei, weil de Alwin Braig, der für de dode Willy Seiler Nachfolgerles g'spield had, hald net lang die Glosse had schrewe dürfe. I bin weder de Willy Seiler, no de Alwin Braig und i kann au ned verspreche, daß'e jede Woch was zum Uffspieße hab, aber gucke mer mal, was sich so ergibd. Ich glaub, s'passierd gnug im Ländle, was mer kommendiere kann.

I deng scho, daß'e ab un zu was schreibe ko.

Un wenn's ned jeder verstehd, was e so schreib, no schlage hald vor: Du der's laud vorlese, des hilfd immer. Solld jedenfalls helfe.

I schreib ned im Honoratioreschwäbisch, sondern oifach so, wie es glernd hab. Noi, ned in de Schul, da had mer ned Dialekd schreibe dörfe, aber dahoim hemmer so g'schwätzt. En Dude gibd's ned zum Nachlage, deshalb weiß e ned, ob e immer alles richtigschreib.

Weiß oiner, wo mer so schwäddsd wie i versuch zu schreiwe? Ois kanne verrode: S'isch ned vom Oberland und ned von Schduargerd.