Württemberg

D'Sauerei gehd weider

2010-08-15T10:16:00.001+02:00

De beschde Artikel, den e bisher üner Stuagert 21 glese hab, isch im Berliner Tagesspiegel gwä. I kann alle nur empfehle, den sauguade Berichd aus Stuagert zu lese.

2010-07-31T03:44:00.005+02:00

Dummheit hoch drei

Jetz henn se ongfange, de Stuagarter Boahhof abzreiße. I hoff, daß die Leit des verhindern könne und alle, die für den Kulturfrevel verandwordlich sinn, solle möglischd bald in'd polidische Pension g'schiggt werre.

A SCHAND ISCH DES!!!!!!!!

2010-03-24T04:46:00.006+01:00

Herzogin Diane von Württemberg wird heute 70
Mer sod’s ja ned glabe, awwer unsre Herzogin von Württeberg wird heit siebzch Johr ald. Seit fascht fuffzg Johr isch se mit Herzog Carl verheiert.

Gorbe isch se am 24. März 1940 in Petropólis in Brasilie, weil ihr Vadder, Henri Graf von Paris wegge seine französische Thronansprüch ned had in Frangreich läbe dürffe und die ganz Familie im Exil war. So richtig kosmobolitisch isch se deshalb worre, weil se ned nur in Brasilie, sondern au in Marokko, Spanie, Portugal und als der de Gaulle die Exilgsetz endlich uffgobe had au in Frankreich gläbd had.

1959 had ihr Bruder Henri a Schweschder vom Herzog Carl gheiert und 1960 had Diane no ihrn Carl kriegd – und Württeberg a ganz nedde Frau Herzogin, die sich richtig gud aigläbd had. Klar, als Reigschmeggde erkennd mer se gleich wenn se de Mund uffmachd, denn ihrn französische Accent had se ned verlore. Aber lieb glingd er, odder ned?

Wer mehr ibberse läse will, sod den Ardiggel im Staatsanzeiger für Baden-Württemberg läse, do steht alles wichdige drinna.

Herzliche Glückwunsch, Königliche Hoheit!

Wenn mer mal mit Quatsch agfange had, kammer nemme uffhere

2010-02-04T07:37:00.004+01:00

'S dümmschde Bauprojegd seidem Turmbau zu Babel

2010-02-02T21:36:00.007+01:00

Jedz hen se also ogfange mid dem Buddlen in Stuagert, um mid dem blödschde Bauprjegd seidem Turmbau zu Babel a ganze Stadt kapudd z'mache.

"Stuttgart 21" nenne die Großkopfede den Grampf.

Un fü'd Nachweld solle die Nome von denne Verandwordliche feschd'kaltde werre:
Bahn-Chef Rüdiger Grube,
Bundesverkehrsminister Peter Ramsauer (CSU) und
Ministerpräsident Günther Oettinger (CDU)
Oberbürgermeister Wolfgang Schuster (CDU)
hen am 2. Februar 2010 den symbolische erschde Schridd undernomme.

Heid verzehle se uns, des ganze Glumb däd 4,1 Milliarden Euro koschde, plus a neie Trass nach Ulm fir nochamol zwei Milliarden Euro, aber mir wisse ja alle, wie die Inflation bei sodde Projegde eisedsd - nur die, die underschriebe hen, die sin davon iwweraschd. Bald wird sich des verdobbelt hawwe un hinderher will's koiner gwäse sei. Rechne kenne se alle ned - aber warum a? 'S zahld doch jemand andersch un ned die, die sich jedz versindige.

Grube schiebd die Ablehnung von alle Nichdpolidiger uf "Vermittlungsfehler der Bahn". Ha, was gäb's denn do no zu vermiddlen? Bledsinn bleibd Bledsinn, au wenn se noch soviel Euros fir Probaganda nauspilvern.

De Grüne-Bundesdagsabgeordnede Winfried Hermann heißd des Projegd "bautechnisch und finanziell extrem riskant". Der Winne schädsd, dass sich d' Koste uf zwölf Milliarden Euro verdoppeln werre.

'S isch a Schand un bleibd a Schand, au wenn se jedz no me Geld in d' Propaganda stgge.

G'schmäckle

2010-01-09T03:29:00.001+01:00

Oettinger nach Brüssel

2009-10-26T07:20:00.002+01:00

Früher had mer gsagd: “Auch Dein Opa nach Europa!” Un jedzd entsorgd mer hald wieder mal on Politiger, den mer nemme hawwe will, indemer ihn nach Brüssel abschiebd. Elegand isch des, was die Angela Merkel do mit dem Günther Oettinger vorhad. Reschpegd!!

Neddamol under CDU-Ohänger had des Güntherle noch d’ Merheid, do had die Angela was mache missa, um die Wahlchance für d’nächschde Landdagswahl zu wahre.

Awwer wenn e’ ehrlich bin, muß e sage, daß e ned glaub, daß an andere den CDU-Karre wieder aussem Dreck ziehe ka. Oder sage mer mal: I hoff, daß es em andere au ned glingd. S’langd mer nämlich mid derre CDU-Herrschafd im Ländle. 56 Joh sind z’ viel, find e. Awwer wie immer in solche Fäll isch des Problem d’Opposition. Die isch ja ned grad addragdiv und au ned viel besser als d’CDU-Regierung.

D'Große abwähle

2009-09-17T10:08:00.002+02:00

Wemmer de Umfrage glaube derf, dann isch’d CDU mit dem Oettinger bei 34 Prozend okomme. Daß’d SPD bloß noch 22 Prozend von de Badner und Wirtteberger wähle däde, na ja, des isch koi Iwwerraschung. Aber wenn’d CDU endlich mal ois uff de Dez kriage däd, des wär feisch schon richtich. I kann scho lang nemmer verstehe, warum’d Leit de Oettinger immer no wähle wolled. Mit so’ner Chaoswirdschaft kammer ja wirglich koi Renommée schaffe.
Stuargert 21 wer immer deirer und trotzdem mached’se in de Landesregierung wieder Propaganda für so a Projegt, des mer ned brauchd und was die Umweld no me schädige däd.

Noi, Stuargert 21 isch bloß’d Spitze vom Eisberg. Vielleichd dud a schlechts CDU-Ergebnis die Pardeileit uffwegge un sie komme endlich dahinder, daß mer’Leid zwar fuffzg Johr bscheiße ko, aber hald doch ned ewich.

Willy Reichert: Auf de schwäb'sche Eisebahne

2009-07-12T01:43:00.004+02:00

Auf de' schwäb'sche Eisebahne
Gibt es viele Haltstatione:
Schtuagart, Ulm, un Biberach,
Meckabeure, Durlesbach
Trulla, trulla, trulla-la

Auf de schwäb'sche Eisebahne
Dürfe d' Küh un d' Ochse fahre
Biable, Mädle, Weib un Ma,
Kurzum, alles was zahle ka

Männer, die im Gsicht ganz bärtich,
Schreiat laut: "Jetzt isches fertich!"
Springet in de Wage nei,
Machet Löchle ins Kärtle nei

Auf de schwäb'sche Eisebahne
Wollt amol a Beierle fahre,
Geht an d' Schalter lupft de Hut:
"A Billettle, send'S so gut!"

Ainen Bock hat er sich kaufet
Un daß er ihm ned verlaufet,
Bindet ehn der gute Ma,
An de hindre Wage na.

"Böckle, musch jetz wacker springe.
S'Fuader werd i dir scho bringe."
Zendt sei stinkichs Pfeiffle a,
Setzt sich zu seim Weible na.

Wie der Zug jetzt dud okemma,
Und d'r Bauer de Bock will nemma,
Findet er bloß Kopf und Seil
An dem hindre Wagedeil.

Do packt de Baure d' Baurezore,
Nemmd de Geißbock bei de Ohre,
Schmeißt ehn, was er schmeiße ka,
Dem Konduktör an 'nd Ohre na.

Des ischd Gschicht von sellem Baure,
Der sain Gaisbock hat verlore
Gaisbock und sei schrecklich End,
Himmel, Schtuagart, Sapprament
---------------------------------------- -------
Mehr zum Thema Kulturdenkmal Bahnhof Durlesbach hier

Die schwäb'sche Eisebahne bezeichnet die erste durchgehende Eisenbahnstrecke von Stuttgart nach Friedrichshafen. Sie wurde vor allem durch das Volkslied Auf de schwäb'sche Eisebahne deutschlandweit bekannt.

Das Lied wurde unter anderem von Willy Reichert (* 30. August 1896 in Stuttgart; † 8. Dezember 1973) gesungen, der es - wie in diesem Fall - als Moritat vortrug.

Die schwäbische Eisenbahn nutzt die (damals neue) Württembergische Hauptbahn Heilbronn - Stuttgart - Ulm - Friedrichshafen, die 1850 fertiggestellt war. Ab Stuttgart führt sie über Plochingen und Göppingen entlang der Filstalbahn und folgt dann ab Ulm der Südbahn über Biberach an der Riß bis zum Bodensee zum Sommerschloß des Königs in Friedrichshafen.

Baubeginn war 1844. Bereits ab dem 29. Juni 1850 war diese Strecke der Königlich Württembergischen Staats-Eisenbahnen durchgehend befahrbar. Die Bewältigung des Albtraufs bei Geislingen an der Steige durch die Geislinger Steige galt zu der damaligen Zeit als technische Meisterleistung. Ziele waren die Anbindung des 1803/1806 neu zum Königreich hinzugekommenen Gebiets von Oberschwaben an Alt-Württemberg sowie die Förderung der Industrialisierung. Anders als in den meisten anderen deutschen Ländern wurde hier die Eisenbahn nicht von privaten Gesellschaften, meist Aktiengesellschaften, sondern vom Staat finanziert.

D'EU will an d' Brezel gehe

2009-02-19T05:46:00.004+01:00

Mer sollt's ja eigendlich ned fer möglich halde, was d'EU so alles reguliere duad. Daß a Gurge grad sei muss, de Grümmungswingel von er Banane ned zu groß sei derf, daß d'Äpfel fleggelos und möglischd Jona Gold sei misse un bloß koi aiheimische Art sei derf, des nimmd mer hald hin. Ändern kann mer's eh ned, ned amol durch Wahle wie im Juni, denn d'Bürokrade bleibe so oder so.

Aber jetzt welle d' Bürograde au no an unser Brezel. Ugsund sei se, moine die, die sich ihr Hindern flachhocke in Brüssel, des schreibt jedenfalls die Südwestpresse. Un sogar in Frankreich had der Spleen Uffmergsamkeid erregt: Bretzel vs EU schreibe se in Franzesisch über des Gschiß. Zu g'salze wäre d'Brezel, 15 Gramm Salz pro Kilo sei halt's viel. Wer's ned mag, soll's hald ned esse. Zwunge wird ja koiner, oder? D'EU will bloß no maximal 1,2 Prozend Salzgehald für d'verwendede Menge Mehl erlaube, was in oim Kilo Brod höchschdens 8 Gramm Salz wäre.

Aber d' Bürograte wäre koine Bürograde, wenn se ned au a Lösung hädde: Stadd gutem (Meer)Salz soll's künfdig Gschmaggsverstärger un andre Zusatzstoffe gäbbe. Als wenn der Dregg gsünder wär. Do waiß ja koiner, was drin isch, beim Salz waiß mers wenigstens.

Mol widder mehr Chemie ins Esse. Had die chemische Industrie doch a starge Lobby in Brüssel. Da zahle sich d' Subventione abber gräftig aus, gell.

Hie gut Württemberg alleweg

2009-01-09T00:34:00.001+01:00

Württemberger Hymne

2008-10-12T18:40:00.008+02:00

Mer sott's ja faschd ned glabe, aber unser sches württeberger Lied feierd a Renaissaince. Was im Königreich Württemberg bis 1918 - aber au no weiter bis nach 1945 - als d' Hymne von unserm Ländle golde had, singd jetz die "Rote Tor Fraktion" für de VfB.

Am 8. Oktober (odder war's am 9.?) isch die ziemlich roggige Versio zum erste Mol g'spielt worde. Und daß des Lieadle an großer Erfolg war, wär underdrieba.

I find des klasse, daß mit der neue Version unser Hymne neu enddeggd worre isch, auch wenn se leider die ledschde Stroph für de VfB g'änderd hen. Des wär ned needig gwä. Wer sich selwer oahhere will, wie'd neue Hymne glingt, sodd sich des Videole oagugge.

http://de.youtube.com/watch?v=--weQ55YTTA

Bisher hen meischdens Männerchör des Lieadle gschmeddert, aber für'd Junge war des nix.

Wer sich's aber drotzdem oahere will, wie des glingt, kann des do mache:

Un zum Mitsinge sind do alle Strophe, damit mer sich ned verdud, wenn's beim VfB mol widder hoch hergehd.

Preisend mit viel schönen Reden
ihrer Länder Wert und Zahl,
saßen viele deutsche Fürsten
einst zu Worms in Kaisersaal.

"Herrlich", sprach der Fürst von Sachsen,
"ist mein Land und seine Macht;
Silber hegen seine Berge
wohl in manchem tiefen Schacht."

"Seht mein Land in üpp'ger Fülle,"
sprach der Kurfürst von dem Rhein,
"goldne Saaten in den Tälern,
auf den Bergen edlen Wein!"

"Große Städte, reiche Klöster",
Ludwig, Herr zu Bayern sprach,
"schaffen, daß mein Land dem Euren
wohl nicht steht in Schätzen nach.

"Eberhard, der mit dem Barte,
Württembergs geliebter Herr,
sprach: "Mein Land hat kleine Städte,
trägt nicht Berge silberschwer.

Doch ein Kleinod hält's verborgen,
daß in Wäldern, noch so groß,
ich mein Haupt kann kühnlich legen
jedem Untertan in Schoß."

Und es rief der Herr von Sachsen,
der von Bayern, der vom Rhein:
"Graf im Bart, Ihr seid der Reichste!
Euer Land trägt Edelstein."

Was mir so ufgfalle isch im Ländle

2008-08-16T06:53:00.002+02:00

Wie dr Willy Seiler no g'läbt had, hadder jeden Samschdag im Süddeutsche Rundfunk a Glosse g'hed: "Was mir so ufg'falle isch im Ländle" had se g'heiße. Und er hat immer um kurz nach elfe im Samschdagsmagazin so uffspiesd, was in der abglaufne Woch so alles passier g'wä isch. Seid 1988 isch der Willy Seiler dod und de Süddeutsche Rundfunk gibt's au nemme. Mer hadd'en Südwestrundfunk draus g'macht, aber des isch nix rechts g'worre.

So isch die Rolle vom Hofnarr also seidher frei, weil de Alwin Braig, der für de dode Willy Seiler Nachfolgerles g'spield had, hald net lang die Glosse had schrewe dürfe. I bin weder de Willy Seiler, no de Alwin Braig und i kann au ned verspreche, daß'e jede Woch was zum Uffspieße hab, aber gucke mer mal, was sich so ergibd. Ich glaub, s'passierd gnug im Ländle, was mer kommendiere kann.

I deng scho, daß'e ab un zu was schreibe ko.

Un wenn's ned jeder verstehd, was e so schreib, no schlage hald vor: Du der's laud vorlese, des hilfd immer. Solld jedenfalls helfe.

I schreib ned im Honoratioreschwäbisch, sondern oifach so, wie es glernd hab. Noi, ned in de Schul, da had mer ned Dialekd schreibe dörfe, aber dahoim hemmer so g'schwätzt. En Dude gibd's ned zum Nachlage, deshalb weiß e ned, ob e immer alles richtigschreib.

Weiß oiner, wo mer so schwäddsd wie i versuch zu schreiwe? Ois kanne verrode: S'isch ned vom Oberland und ned von Schduargerd.